జీవితమే అమృతము

బ్రతుకంటే బంధమనీ
బంధమంటే బాధ్యతనీ
బాధ్యతంటే త్యాగమనీ
త్యాగమే మఱి మోక్షమనీ

అర్థమైతే జీవితమే
రుచియించును అమృతమై

ప్రస్తుతకాల శత్రువులు
గతకాల మిత్రులేననీ
పెఱుగుతాయి బంధాలు
పెంచుకున్నప్పుడేననీ
అపరిచితాలైతేనే
అన్ని బాధలు భయాలనీ
తెలుసుకున్న కొద్దీ అంతా
తేలికైపోతుందనీ || అర్థమైతే ||

ప్రతి ముఖమూ ఎప్పుడో ఎదురు
పడినట్లే ఉంటుందనీ
ప్రతి స్వరమూ ఎక్కడో విన-
పడినట్లే ఉంటుందనీ
ప్రతిసీమలో తన దేశపు
పరిమళం వీస్తుందనీ
ప్రతి వేదనా తన హృదయ
ప్రతిధ్వని మటుకేననీ  || అర్థమైతే || 

మంచిచెడులు మసకలనీ, లోకం
నలుపూ తెలుపూ కాదనీ
ఎవఱైనా ఏడురంగుల
ఇంద్రధనుసులేననీ
బ్రతుకు విద్యాభ్యాసమనీ
లోకం గురుకులవాసమనీ 
ఆదరించినా లేకున్నా 
అందఱూ గురువులేననీ  || అర్థమైతే ||