వద్దురా సిద్ధాంతాలు !

వద్దురా! సిద్ధాంతాలొద్దురా !!
రాద్ధాంతాలొద్దురా
మనకు మానవతే ముద్దురా!

సిద్ధాంతంతో నువ్వవుతావు
సింహానివీ చిఱుతపులివీ
మనసుకు మాత్రం హత్తుకోవు
మనిషిగా, నిండు మనిషిగా || వద్దురా ||

నీ సిద్ధాంతాల కళ్ళల్లో
నేఱస్థులేరా ప్రతి ఒకఱూ
సహజాలన్నీ చట్టవిరుద్ధం
వైవిధ్యం పెద్ద అబద్ధం || వద్దురా ||

సిద్ధాంతాల ఉన్మాదంలో 
చితికిపోతుంది మానవత్వం
సూక్ష్మాంశాలకు చోటుండదు
చెబితే వినే నాథుడుండడు || వద్దురా ||

సిద్ధాంతాల శీధువు మత్తులు
శిరస్సుకెక్కిన తాగుబోతులు
తమ కళ్ళు పొడుచుకుంటారు
తప్పుదారిన నడిపిస్తారు || వద్దురా ||

పిడుగూ-బియ్యాలకొకటే మంత్రం
గుంపుగూండాయిజం తమ తంత్రం
ఎంతసేపటికీ తమదే గొడవ
ఎదుటివాడెల్లప్పుడూ వెధవ || వద్దురా ||

సిద్ధాంతాలు పద గారడీలు
పరస్పరం వెకిలి పేరడీలు
మతిగల మతిహైన్యాలు, హృదయం
శ్రుతి చెయ్యని కఠోర వాద్యాలు || వద్దురా ||